ازيكوا عاملين اية وحشتووونى اوووى
طبعا احنا داخلين على مدراس ومذاكرة
انا انهاردة هتكلم عن كل بنوتة داخلة 1 اعدادى او 2 اعدادى او 3 اعدادى
انا داخلة 2 اعدادى
فأنا بنصحكوا وبنصح نفسى معاكم
يالا ندخل على الموضوع
اولا :- لازم تثبتى نفسكــ قدام المدرسين ووسط البنات فى فصلكــ
ازاى أنا هاقولكــ
اولا:- ماتهزريش كتير مع المدرسين الرجال هى كفاية اووى
ابتسامة بسيطة منكــ ولو مش عايزة خلاص
وماتعمليش زى البنااات
الى بتقعد تكركر وتضحك بصوت عالى
لأن دول بنات مش محترمين
يرضيكى حد يقول عليكى بنوتة مش محترمة
اكيد لاء
يبقى دى اول نقطة
ثانيا:- تهزرى وتكلمى مع كل المدرسات البنات لكن بحدود بردة علشان فى بنات بتدلع مش بتهزر
كدة انتى بقيتى ليكى شخصيك مابين المدرسين
دولقتى بقى هاقولك ازاى اصحابك يحبوكى ويكون ليكى شخصية مابينهم
اولا:- تراجعى على منهج السنة الى فاتت مراجعة سريعة فى اخر الاسبوع بتاع الاجازة
(( طبعا انا عارفة ان مافيش حد هيعمل كدة بس اهى نصيحة ))
ثانيا:- بقى متتكبريش على بنت من البنات اللى تيجى تكلمك كلميها وحسسيها انك سمعاها كويس ومهتمة بكلامها
ساعتها هتلاقى البنات كلها بتقول عليكى كويسة وهيحبوكى اووووى
دلوقتى هاقولك ازاى تختارى اصحابكـ
اولا انتى هتكلمى كل البنات بتوع الفصل وحشين او حلوين هتكلمى الكل ومتعمليش حواجز بينك وبينهم عشان الكل يحبك
ثانيا انتى هتختارى افضل البنات بس هما اللى هيبقوا اصحابك اوى اوى ومش شرط تبقوا قاعدين جنب بعد صدقونى
انا كانت الشلة بتاعتى كلها متوزعة فى الفصل كله ولعلمك دا احسن عشان تركزى فى الحصة كويس
ثالثا انتى متسمحيش لحد من اصحابك انه يتطاول عليكي او يشتمك بالأم والاب لأنك هتلاقى بنات كتير الموضوع دا بالنسبة ليهم عادى
لكن انتى توقفيهم عند حدهم وكمان اياكى تقولى كلام زى اللى بيقولوه اوعى
انا عملت كدا وكانوا بيجوا لحد عندى ويقولوا لا محدش يشتم ميار الشتايم دى عشان ميار محترمة
طبعا هما كانوا بيقولوها تريقة لكن انا عندى يتريقوا عليا عشان محترمة احسن ماكون زيهم
رابعا هتلاقى بنات كتير بيقولوا كلام مش كويس مش هقولكم ايه هو الكلام دا انتوا هتسمعوا بنفسكم
وهتلاقوا برضوا بنات بيعملوا حاجات مش كويسة زى الكلام مع الولاد وكدا
والمشكلة انهم بيحكوا ومفتخرين جدا انتى ساعتها اعملى عبيطة وافضلى قولى يعنى ايه مش فاهمة رغم انك هتفهمى بعض الحاجات
لكن برضه اعملى عبيطة مش فاهمة والله يا جماعة كانوا لما يجوا يقولوا كلام وحش يقولولى ميار انتى محترمة متقعديش معانا
انا كنت بزعل ساعتها وعايزة اقعد معاهم لكن بعد كدا هتلاقى انك لما تبقى هبلة ومش فاهمة احسن بكتير بدل ماتفهمى اللى بيقولوه وتبقى واحدة منهم
خامسا متخليش حد يهزر معاكى بالأيد لأن ممكن بنت تقوم ضرباكى بالقلم وجارية
وانتى مش هتقعدى تجرى وراها عشان ترديلها القلم لا طبعا انتى كدا معندكيش شخصية
انتى تزعقيلها جامد وتقوليلها مبحبش حد يضربنى لو كررتيها هتزعلى منى كفاية الجملة دى اصلا هتخليها تيجى تقولك انا بهزر ومتبقيش كدا ومش عارفة ايه
بس ساعتها هتبينى لكل البنات امك طيبة اه لكن مبتاخديش على قفاكى
سادسا مش اى حاجة البنات تعملها تقلديها اوعى
ساعتها يبقى معندكيش شخصية ....يعنى بنت بتقول انا بحط ميك اب خفيف قبل ماجى المدرسة
تقومى انتى زى الهبلة تحطى ميك اب وتقولى مانا عايزة ابقى جميلة زيها
انتى هتبقى جميلة بس بماسكات وحاجات طبيعية هتعمليها فى البيت وفتكات مليااانة
سابعا بقى حاجاتك تبقى معاكى على طول مش تقعدى تستلفى كل شوية استيكة مسطرة
مين معاها ماية مين معاها منديل ...لالالالا حاجاتك معاكى وبزيادة عشان كمان لو حد طلب منك حاجة تبقى كريمة معاهم مش جلدة ههههههههه
واوعى تنسى مطهر الايد اللى هو الجيل دا طلعيه وكل شوية تحطى منه عشان الكل يعرف انك بنت نضيفة
لو فى اى تعديل ياريت الادارة تعدلهولى او تقولى علية
واتمنى تكونوا استفدوا من موضوعى
